Her et kort intervju med Kjartan Fløgstad i dagens "Varden" (se under).
Fløgstad er nå aktuell med Grenland Friteaters dramatisering av utdrag
fra hans (i dobbelt forstand) fantastiske industri-litteratur. Stykket «Harde tak»
settes opp til uka, på PMV -- Porsgrunn mek. verksted. Mer om stykket her:
http://www.telemarksnett.no/friteateret/pit/festival2000/program/forest/hardet.html
En av kveldene, onsdag 14. juni, vil Fløgstad i tillegg holde et foredrag på en
kafe i Porsgrunn -- "om det høge og låge i litteratur og anna kunst":
http://www.telemarksnett.no/friteateret/pit/festival2000/index_ny.htm
Begge deler er innslag i Porsgrunn Internasjonale Teaterfestival, 11 - 18. juni
Mvh. Bjarne Nærum
---------------------------------------------------------
- Eg er framleis sosialist
Medan ein del venstreradikale rømmer barrikadane og hamnar i det eksistensielt sjølvopptatte vedgår forfattaren Kjartan Fløgstad at han framleis reknar seg som sosialist. Tysdag var han i Porsgrunn for å sjå prøvene på «Harde tak» - Grenland Friteaters dramatisering av delar av hans roman »Fyr og Flamme» frå 1980.
Olav Bøe
Per-Eirik Hekkelstrand (foto)
INDUSTRI. Kjartan Fløgstad har vore oppteken av norsk industrireising - her på vestsida der Grenland friteaters «Harde tak» snart skal visast.
PORSGRUNN - Eg har ofte opp gjennom åra vorte kopla saman med AKP-arane, og det er ein feil som irriterer meg. Men eg har vore og er framleis sosialist - fordi eg ser at Marx sine analysar gjeld i dag i minst like stor grad som før. Me ser dette i fleire ting, blant anna monopoliseringa av kapitalen og me ser det i korleis den spekulative finanskapitalen har byrja leve sitt eige liv heilt frigjort frå produksjonskapitalen, seier vinnaren av Nordisk råds litteraturpris frå 1977. Varden gjettar og får stadfest at han har vore innom SV med stemmesetelen.
Arbeiderklasse?
På spørsmål om industristader som Sauda og Porsgrunn har ei framtid, svarar Fløgstad: «Ikkje som reine industristader» og legg til at «Gud ikkje har bestemt at det skal smeltast afrikansk malm i Sauda». Men han trur at billeg vasskraft og kompetanse bør borge for fortsatt liv.
- Finst det ei arbeiderklasse i Noreg lenger i ei tid der der arbeidarane i industrien kallar seg prosessoperatørar og bur i like fine hus som direktørane?
- Å ja. Sjå berre streiken i vår. Klasseskiljet er minst like stort no. Men skiljet arbeid og kapital ter seg annleis i dag. Sjølv om du ikkje lenger har direkte fattigdom i klassisk forstand har store grupper blitt utstøytte tidleg frå arbeidsmarknaden og det er svært mange som blir førtidspensjonerte. Og det finst elles sosialt utstøytte grupper av fleire slag. Og på verdsnivå er den tredje verda meir undertrykt enn nokon gong.
Fløgstad meiner at i Noreg i dag er skilnaden mellom dei styrte og dei styrande større enn på lenge.
- Sjå berre på den rekordlåge valdeltakinga. Politikken i dag greier ikkje fange opp dette mistilhøvet mellom styrande og styrte og dette bør no litteraturen prøve å skildre.
- Du og andre venstreradikale norske forfattarar har blant anna skrive det som noko forenkla blir kalla arbeidarlitteratur. Men vart den eigentleg lest av arbeidarane?
- Sjølvsagt vart den det! Eg kan berre snakke for meg sjølv men eg var på eit seminar i Sverige om «Dalen Portland» - Dette er stor kunst men blir den forstått av arbeiderklassen, sa ein svensk akademikar. - Dette er god litteratur men er det stor kunst når den fortel det alle veit frå før? spurte ein tillitsmann i Sauda som hadde lese same boka. Dette gav meg ei sterk oppleving som førte til at eg sette meg og skreiv «Fyr og Flamme», smiler den ungdommelege 56-åringen, no busett i Oslo. På spørsmål om kva slags gløymde tema i norsk virkelegheit han kunne tenkje seg å skrive om no, svarar han:
- Til dømes den utviklinga som har skjedd i landet vårt som gjer at ein arbeider er prosessoperatør og ikkje lenger er ein arbeidar i del av eit kollektiv. No sit han der einsam i fabrikken ved ein datapult og styrer ein industriprosess. Kva har skjedd med han i denne utviklinga?
Etter «Harde tak» i Porsgrunn blir det snart utgjeving av eit oppdragsessay om Oslo by.
- Dette er bygd på harde sosiologiske fakta henta frå Statistisk sentralbyrå. I Oslo er den tradisjonelle arbeidarklassa utradert. Dei miste siste industristaden hjå Kværner i Lodalen ganske nyleg. Dette blir no lokale for Nasjonalteateret, med andre ord: Frå industrikultur og til kulturindustri, avsluttar forfattaren som elskar fengande og dobbeltbotna titlar.
http://www.varden.no/apps/pbcs.dll/artikkel?Avis=VA&Dato=20000607&Kategori=KULTUR&Lopenr=438730&Ref=AR&forside=1
This archive was generated by hypermail 2b29 : Thu Aug 03 2000 - 10:25:51 MET DST