Eg har få innvendingar. Det meste av hennar framlegg, å vere nøye med
kjelder, gi brei dekning, referere nøyaktig det folk seier, ikkje la seg
styre av eigne ønskemål med meir, er fornuftige retningsliner for
journalistar i dei fleste media. Om lag slik trur eg ei førelesing i etikk
for medieelevar blir disponert. Det meste om Klassekampen er også
fornuftig, men kanskje vel rundt til at det løyser problem.
Eg har difor to spørsmål:
1. Klassekampen har ein formålsparagraf som slår fast at avisa skal drivast
"ut fra et sosialistisk, revolusjonært grunnsyn." Kvar blir det av dette i
dine retningsliner? Eg finn lite att av det og finn heller ikkje noko om
kva det tyder i praksis.
2. Den førre redaktøren vart sagt opp fordi han ikkje sette
formålsparagrafen ut i livet, men "unnlot å utnytte avisas muligheter til å
framheve det eneste revolusjonære valgalternativet (RV) for å nå målet om
fortsatt stortingsrepresentasjon" (oppseiingsbrevet sitert frå Torstein
Tranøy: En annerledes oppsigelse, Klassekampen-forum 25.10.97). I dei
retningslinene Mikkelsen har forma ut, les eg til dømes: "ikke utelat
vesentlig informasjon fordi den ikke passer inn i konklusjonen din". Eg
les også om Klassekampen: "Journalistene skal dekke venstresida ut fra at
venstresida har noe interessant å melde og interessante saker å fortelle
om. Journalistene skal ikke dekke for eksempel RV ut fra at det er lenge
siden RV var i KK, nå må vi gi dem litt plass". Eg er samd i alt saman, det
er ei konkret formulering for korleis informasjon og ikkje agitasjon er
hovudsaka for avisa på dette saksfeltet. Problemet er at å følgje dette i
visse høve altså er oppseiingsgrunn frå arbeidsgjevar AKP sin synsstad.
Dette trugsmålet har den nye staben hangande over sine hovud om dei vil
prøve å setje Mikkelsen sine retningsliner ut i livet. Spørsmål 2 er kva du
vil gjere med det, Mikkelsen?
Føreåt takk for svar!
Olav Randen