Forskinga skal gi eit grunnlag for det teknisk-industrielle
utviklingsarbeidet som står att å gjera for at energien i
havbølgjene skal kunna bli utnytta til energiforsyning i
større målestokk. Bølgjeenergien, som er ei rein og fornyeleg
energikjelde, blir skapt ved omforming av ein del av
vindenergien over havområda. Vindenergien blir skapt ved
omforming av ein del av solenergien. Ved begge desse
omformingane blir energistraumen fortetta (rekna i watt pr.
kvadratmeter flate). Rett under vassflata i havet er
bølgjeenergistraumen, i tidsmiddel, typisk om lag fem gonger
tettare enn vindenergistraumen 20 m over havflata, og 10 til
30 gonger tettare enn solenergistraumen. Dette gir gode voner
for at bølgjekraftverk kan bli kommersielle og i framtida
spela ei viktig rolle i energiforsyninga for mange
kyststatar.
HISTORIKK [For fleire historiske detaljar enn i
samandraget nedanfor klikk
her.] Forskingsgruppa har sidan 1973 arbeidt med
metodar for utnytting av energien i havbølgjene.
Førsteamanuens Kjell
Budal (1933-1989) tok i desember 1973 initiativet til
bølgjekraftforskinga ved NTH, og Johannes Falnes var med i
arbeidet frå starten. Per Magne Lillebekken har arbeidt i
gruppa sidan 1980. Seks personar har teke graden doktor
ingeniør (dr.ing.) i bølgjekraftforskinga ved NTH, nemleg Lars
Christian Iversen i 1980, Åge Kyllingstad i 1982, Oddbjørn
Malmo i 1984, Geirmund Oltedal i 1985, Arne Brendmo i 1995 og
Håvard Eidsmoen i 1996. I tilknyting til dette
forskingsarbeidet har dessutan 24 studentar fullført
hovudoppgåva ("diplomen") i sivilingeniør-studiet. I
bølgjekraftforskinga har denne gruppa gjort banebrytande
arbeid som også er godt internasjonalt kjent, både når det
gjeld grunnleggjande teoretisk arbeid og, kanskje særleg,
prinsipp for optimal styring og fasestyring av
bølgjekraftverk. I åra 1978-82 fekk forskings- og
utviklingsarbeidet med bølgjekraftverk, etter måten mykje,
finansiell støtte frå Olje- og energidepartementet. Den stor
allmenne interessa for miljø- og ressursspørsmål i 1970-åra
stilna etterkvart av, og samstundes gjekk oljeprisen ned. Då
vart det etter 1982 vesentleg mindre med støtte til
bølgjekraftforskinga. Gruppa har likevel greidd å halda i gang
ein viss forskingsaktivitet og vedlikehald av vunnen kunnskap
og kompetanse. Sidan 1994 har gruppa samarbeidt med bedrifta
Brødrene Langset AS, frå 1998 med den nye bedrifta ConWEC AS,
om utvikling av eit fasestyrt bølgjekraftverk. Av dei nemnde
personane er to framleis i dagleg arbeid ved Institutt for
fysikk, nemleg professor emeritus, dr.techn. Johannes Falnes og
overingeniør Per Magne Lillebekken.
Dessutan arbeidde to personar i bølgeenergi-gruppa i 2000 og
2001, nemleg Jørgen Hals og Torkel Bjarte-Larsson, begge med
fersk sivilingeniørutdanning frå NTNU. Torkel Bjarte-Larsson
held fram med sitt dr.-ing.-studium også i 2002 og 2003.
UNDERVISNING OM BØLGJEENERGI Bølgjeenergi er eitt
av fleire delemne i faget Energi og fysikk, eit fag som det
har vore undervist i kvart år frå 1974, då Jørgen Løvseth
starta faget ved AVH. Etter 2000 er det slått saman med faget
Energi- og miljøfysikk. Eit tyngre og meir teoretisk fag,
Havbølgjeenergi, har det, inntil 2001, vore undervist i om lag
annakvart år frå 1979, då Johannes Falnes starta dette
dr.-ing.-faget ved NTH.
RAPPORTAR OG PUBLIKASJONAR Ei særskild liste
nemner forfattarar av og titlar på vitskaplege
artiklar, rapportar og andre publikasjonar frå
bølgjeenergigruppa. Dessutan er følgjande artiklar/rapportar
lagde ut i fullstendig versjon på Internet:
J. Falnes: "Energi
frå havbølgjer før, no og sidan." Denne (1996-)
artikkelen inneheld eit oversyn med litt historikk om
bølgjekraftforskinga. Artikkelen, som har to figurar, er
skriven med tanke på lesarar som ikkje er spesialistar. Til
slutt i den artikkelen er ei liste med titlar på bøker
med stoff om bølgjekraftverk. Ein revidert versjon av
artikkelen er trykt i Elektro, årgang 110, nr. 6, 1997, s.
58-64.
J. Falnes: "Prinsipp
for opptak av energi frå havbølgjer. Fasestyring og optimal
svingerørsle." Med å visa til illustrasjonar (seks
figurar), men utan å bruka matematikk, forklarer denne (1997-)
artikkelen prinsippet for opptak av bølgjeenergi med hjelp av
eit svingesystem. Det er også forklart korleis systemet skal
svinga for at energiopptaket skal bli størst mogleg. Prinsippa
som er forklarte i denne artikkelen, har vore retningsgjevande
for bølgjekraftforskinga ved universitetet i Trondheim i meir
enn tjue år. Artikkelen har 15 litteraturtilvisingar, og han
er skriven med tanke på lesarar som ikkje er spesialistar. Ein
revidert versjon av artikkelen er trykt i Elektro, årgang 111,
nr. 1, 1998, s. 102-106. J. Falnes: "Principles
for capture of energy from ocean waves. Phase control and
optimum oscillation." Engelsk versjon av den same
(1997-) artikkelen.
J. Falnes: "Optimum
control of oscillation of wave-energy converters".
Paper no. 2 in Annex Report B1 to the JOULE project "Wave
Energy Converters: Generic Technical Evaluation Study".
Contract no. JOU2-0003-DK between the Commission of European
Communities and Danish Wave Power aps. August 1993. Denne
engelskspråklege publikasjonen er spreidd i heller få
eksemplar, så difor har vi lagt ut denne artikkelen på
Internet. Artikkelen, som gir eit oversyn over
forskingsarbeidet (i 20-årsperioden etter 1973) på optimal
styring av bølgjekraftverk med tanke på maksimalt energiuttak,
er eigentlig skriven med tanke på lesarar som er spesialistar,
endå der er brukt svært lite matematikk. Artikkelen er utan
illustrasjonar, men har 39 litteraturtilvisingar.
H. Eidsmoen: "Simulation
of a tight-moored amplitude-limited heaving-buoy wave energy
converter with phase control". Denne lange (1996-)
artikkelen, som inneheld 12 figurar, 7 tabellar, 28
litteraturtilvisingar og 18 nummererte matematiske formlar, er
skriven på engelsk med tanke på lesarar som er spesialistar.
Artikkelen er ei vidareføring og utviding av følgjande
publiserte arbeid: Eidsmoen, H.: "Simulation of a
heaving-buoy wave energy converter with phase control".
Proceedings of the Second European Wave Power Conference,
(redigert av Elliot, G. og Diamantaras, K.) Lisbon, Portugal,
8-10 November, 1995, European Commission ECSC-EC-EAEC,
Brussels, pp 281-288, 1996. (ISBN 92-827-7492-9). Eit
samandrag av artikkelen er trykt i Applied Ocean Research,
Vol. 20, No. 3, 1998, pp. 157-161.
H. Eidsmoen: "Simulation of a slack-moored heaving-buoy wave
energy converter with phase control". Denne lange
(1996-) artikkelen, som inneheld 10 figurar, 13 tabellar, 34
litteraturtilvisingar og 19 nummererte matematiske formlar, er
skriven på engelsk med tanke på lesarar som er
spesialistar. |