Dåpsliste, kyrkjeboka for Volda (med Ørsta) 1741 - 1760

Denne versjonen kan du (gratis) bruke til eige bruk, men ikkje spreie eller
publisere på nokon måte. Eg har opphavsretten til denne avskrifta, og skal
refererast til om du brukar data herifrå.
(Fordi dette er meir enn ei rein avskrift, jfr. normalisering av gardsnamn
og kryssreferanse til innleiingar, vil verket få meir enn 'katalogvern').

I avskrifta er innførslene oppdelte med felt (sjå meir nedanfor) for
kyrkje, kjønn, namn, faddrar (for dei fleste borna har eg ikkje skrive
av fadderlista), merknader og normalisering av gardsnamn.
Orginalen har ei spalte med kyrkjestad og kyrkjeleg tidfesting og ei spalte
for dåp. Det er ikkje alltid fullt samsvar mellom desse spaltene, slik at
for nokre barn kan dagen vere uviss.
Datoen er stort sett ikkje med i orginalen, så det har eg føya til ut frå
den kyrkjelege dagsetjinga.
Det ser ut til at faddrane stort sett var frå same garden eller frå ein
grannegard; men dette har eg ikkje granska systematisk.
Kjønnet har eg sett til ut frå namn/patronymikon.
Det er ingen regel at barnet vart døypt i det soknet det høyrde til. Etter
forskriftene skulle det døypast innan åtte dagar, og då måtte dei fare dit
det var gudsteneste først. Soknetilknytinga for barnet har eg sett til
etter gardsnamnet. For gardar med namn som finst i begge sokna, har eg sett
på kvar faddrane kom frå, og på kvar mora vart innleidd. For ein del born,
er soknetilknytinga uviss.

Avskrifta er gjort frå mikrofilmkort, og deretter korrekturlest mot
papirkopien ved Statsarkivet i Trondheim. Nokre innførsler er uklare også i
papirkopien og er korrekturleste mot sjølve originalen.

Avskrifta ligg på ei tekstfil som liknar utskrifta nedanfor, men der
feltskilja er litt tydlegare. Eg har laga eit lite program (Fortran) som
les tekstfila og handterar tekstdelane slik det passar meg. Dersom du har
framlegg til/ønskje om ei anna/betre presentasjonsform, høyrer eg gjerne
frå deg. (Men eg lovar ingen ting --ting tek tid.)