Språket som vart norsk
Denne læreboka i norsk språkhistorie (Universitetsforlaget, 2019) fortel historia om språket me kallar norsk. Ho byrjar på eit tidspunkt då det slett ikkje er opplagt at det var same språket som me brukar i dag, og fylgjer utviklinga fram til 1800-talet og dei tradisjonelle dialektane våre.
Boka gjev ei innføring i språkhistorie som fagdisiplin, korleis me kan finna ut noko om eldre språk, og korleis språkhistoria kan forklara trekk ved moderne norsk. Framstillinga fylgjer hovudlinene i utviklinga av både skrift og tale, med ekstra vekt på to emne:
- Gamalnorsk, med eit oversyn over grammatikken og nokre tilrettelagde lesestykke.
- Mellomnorsk, med gjennomgang av nokre viktig språkendringar me møter att som «målmerke» i dialektologien.
Boka er skriven for norsk- og nordiskstudentar på universitet og høgskular. Sentrale omgrep vert forklarte undervegs og i vedlegg om grunnleggjande grammatisk terminologi, så jamvel om nokre delar (gamalnorsk grammatikk, ljodutvikling i mellomnorsk) er litt tekniske, kan mesteparten lesast også av den interesserte ålmenta.
Tilleggsressursar
- Bøyingsskjema som oppsummerer sentrale delar av den gamalnorske morfologien. Dette kan vera til hjelp i arbeid med lesestykka.
- Glossar med orda som er bruka i lesestykke og døme på norrønt/gamalnorsk i boka. Sist oppdatert/retta 14. mai 2020.
- Rettleiing til korleis ein kan nytta glossaret og bøyingsskjemaet i arbeid med tekstar. Det finst også ein videoversjon.
- Videoførelesing med grundig gjennomgang av avsnittet om Grønland i § 3.5.4.
- Videoførelesing med grundig gjennomgang av utdraget frå eit mellomnorsk diplom i § 6.1.1.